स्मृतीबनातून-विकल मन(पद्य)

मन:स्थितीच्या विपरीत परिस्थिती हा तसा सार्वत्रिक अनुभव म्हणता येईल. संवेदनशील मनांना मात्र तो अधिक बोचरा वाटतो. असहाय्य वाटतो.

विकल मन

पाऊस रुपेरी चांदण्यांचा जेव्हा बरसला मनात

निष्पर्ण कोरडे झाड निथळले तिथे वनात

फेसाळ शुभ्र लाटा उसळल्या जशा अंतरात

सोबतीस कुणी हाय नव्हते भिजण्यास सागरात

स्वर गोड पावरीचे दाटले हे उरात

भाव मुग्ध राधा नव्हती त्या सूरात

 

तारा अश्या तन तंबुरीच्या झंकारल्या स्वरात

स्वरशब्द हरपले होते गाऊ कसे स्वगीत

हुरहुरता स्वर मारव्याचा दाटला कंठात

तरळले लोचनी अश्रू ओघळले रित्या ओंजळीत

रज कण अस्तित्वाचे विखुरले विकल अंतरात

वारस कुणीही नव्हता करण्यास ते प्रवाहित 

नितीन सप्रे

नवी दिल्ली

मार्च 2023